Türkmenistanyň Agrar partiýasy
Her bir ýyly özüne mynasyp at bilen gelýän Berkarar döwletimiziň täze eýýamynyň galkyşy döwründe ýurdumyzyň ähli ugurlary bilen bir hatarda hormatly Prezidentimiz oba hojalygy pudagyna hem aýratyn üns berýär. Azyk bolçulygyny döretmek, ösdürilip ýetişdirilýän ekinleriň bol hasylyny almak bilen baglanyşykly tutumly işler giň gerimde durmuşa geçirilýär. Oba senagat toplumyny özgertmäge gönükdirilen döwlet maksatnamalaryndan gelip çykýan wezipelere laýyklykda, degişli agrotehniki kadalaryň esasynda işleri geçirmek, degişli tehnikalary we enjamlary ulanmak arkaly önümçiligiň ýokary derejesi üpjün edilýär.
Türkmen halkynyň özboluşly durmuş ýolunda galla harmanyna rysgal-berekediň, baýlygyň özeni hökmünde aýratyn hormat goýulýar. Ekerançylyk medeniýetiň baý mirasyna eýe bolan ata-babalarymyz bugdaýyň dürli görnüşlerini ösdüripdirler, olary ýetişdirmegiň dürli usullaryny durmuşa ornaşdyrypdyrlar. Bugdaýdan bol hasyl almagyň ussady bolan ata-babalarymyzyň onuň her bir dänesini gadyr bilen ýygnap, zähmetkeşligiň aýdyň nusgalyk ýoluny miras goýypdyrlar. Türkmen daýhanlarynyň yhlasly zähmeti bilen ýetişdirýän bol hasyly bazarlarymyzy dolduryp dur. Ýylyň islendik paslynda saçaklarymyzy dürli-dümen önümler bilen bezemäge mümkinçilik berýän bu bolçulyk Berkarar döwletimiziň täze eýýamynyň galkyşy döwrüniň eşretli miweleriniň biridir.
Halkymyzyň abadan ýaşamagy üçin ähli zerur şertleri döredip berýän Gahryman Arkadagymyzyň, hormatly Prezidentimiz Arkadagly Serdarymyzyň janlary sag, ömürleri uzak bolsun! Alyp barýan döwletli işleri rowaçlyklara beslensin!
Türkmenistanyň Agrar partiýasynyň Balkan welaýat komitetiniň guramaçylyk we syýasy işler bölüminiň sanly tehnologiýalar we maglumat howpsyzlygy boýunça baş hünärmeni Toýguly Isagulyýew