Türkmenistanyň Agrar partiýasy
Köneürgenç etrabynyň zähmetsöýer babadaýhanlary Halkyň Arkadagly zamanasy ýylynda 18000 gektar ýerde döwletimiziň iň bir gymmatly baýlygy bolan ak-altynyň bereketli hasylyny ösdürip ýetişdirýärler. Pagta kärendeçiler üçin awgust aýy gowaçanyň ideginde iň bir jogapkärli döwür hasaplanýar. Häzirki wagtda kärendeçiler gowaçalara ösüş suwyny tutmak, gowaçalaryň ujyny çyrpmak we gül gunçalara beslenip otyran gowaçalary zyýan beriji mör-möjeklerden goramak işini dowam etdirýärler. Daşoguz welaýat Ösümlikleri goramak bölüminiň Köneürgenç etrabyndaky baş hünärmeni Nuraly Baýatow bilen söhbetdeş bolanymyzda gowaçalary zyýan berijilerden goramak boýunça etrabymyzda alnyp barylýan işler dogrusynda şeýle gürrüň berdi.
- Etrapda jemi 17-ny bio labaratorýalar-da gerekli bio önümler taýýarlanýar. Daýhan birleşiklerde, dökünhimiýa bazasynda, pagta arassalaýjy kärhanasynda hereket edýän bu labaratorýalarda öz işine ezber işçi, hünärmenler zähmet çekip, taýýarlanýan bio önümleriň ýokary hilli bolmagyny gazanýarlar. Etrabymyzyň gowaça meýdanlaryna altyngözlije, trihogramma doly goýberilip gutaryldy. Şu günleri gabrabrakon goýbermek işi hünärmenleriň gözegçiligi astynda amala aşyrylyp, her güni 700 gektardan gowrak ýere goýberilýär. Ekinleri zyýan berijilerden goramakda “Akgala”, “Bereket”, “Maslahat”, “Täzeýap”, “Derýalyk”, “Zaman” daýhan birleşikleri iş görkezijileri bilen aýratyn tapawutlanýar. Ekinleriň biologik usulda goralmagy bol hasylyň kemala gelmeginde aýratyn ähmiýete eýe. Hut şunuň bilen baglylykda bio labaratoriýa işgärleri bu işi öz wagtynda ýokary hilli geçirilmegi ugrynda gün-günden iş depginlerini barha batlandyrýarlar.
Gülhumar HOJAHMETOWA Türkmenistanyň Agrar partiýasynyň Daşoguz welaýatynyň Köneürgenç etrap komitetiniň esasy hünärmeni