Türkmenistanyň Agrar partiýasy
Berkarar döwletiň täze eýýamynyň Galkynyşy döwründe Arkadagly Serdarymyzyň baştutanlygynda ýurdumyzyň tebigatyny, daşky gurşawy goramak ulgamynda uly işler, şeýle-de halkara guramalar bilen işjeň hyzmatdaşlyk alnyp barylýar. Hormatly Prezidentimiziň başlangyjy bilen daşky gurşawy goramak, tebigatymyza aýawly çemeleşmek döwlet syýasatynyň ileri tutulýan möhüm ugurlarynyň birine öwrüldi. Eziz Diýarymyzda ekologiýa, daşky gurşawy goramak babatda milli kanunçylygy kämilleşdirmek boýunça ähli zerur işler yzygiderli amala aşyrylýar. Döwletimiz tutuş adamzat üçin möhüm ähmiýeti bolan daşky gurşawy goramagyň wajyp meselleriniň çözgüdine uly goşant goşup gelýär. Olaryň ählisiniň Birleşen Milletler Guramasy tarapyndan oňyn goldawa eýe bolup, eýýäm öz netijesini berýändigi has-da guwandyryjydyr. Şoňa laýyklykda ýurdumyzyň tebigy baýlyklaryny gorap saklamak, olardan rejeli peýdalanmak, ekologiýa taýdan arassa, kämil tehnologiýalary önümçilige ornaşdyrmak, umuman, ekologiýa howpsuzlygyny üpjün etmek döwlet syýasatynyň möhüm ugurlarynyň birine öwrüldi. Şeýle hem bu ugurda täze kanunlar taýýarlanylýar, hereket edýän kanunlar döwrüň talabyna laýyklykda kämilleşdirilýär. Olardan “Aýratyn goralýan tebigy ýerler hakynda”, “Ösümlikleri goramak hakynda”, “Haýwanat dünýäsi hakynda”, “Atmosfera howasyny goramak hakynda”, “Ekologiýa howpsuzlygy hakynda” Türkmenistanyň Kanunlaryny, kanunçylyk namalarynyň birnäçesini görkezmek bolar. Ekologiýa abadançylygy howanyň arassalygyny üpjün etmegi, şäherleri gurşap alýan gök zolaklary ösdürmegi, suw, ýer we tokaý serişdeleriniň berk goragyny döretmegi, ösümlik we haýwanat dünýäsiniň köpdürlüligini gorap saklamagy öz içine alýar.
Döwletimiz howanyň üýtgemegi, ýer we suw serişdeleriniň netijeli peýdalanylmagy, çölleşmä garşy göreş, Hazar deňiziniň gurşawynyň arassalygyny, biologik dürlüligini saklamak babatynda hem birnäçe işler durmuşa geçirýär. Müňlerçe ýyllardan bäri, adamzat tebigatyň eçilen baýlyklaryndan rejeli peýdalanmaga, onuň bilen sazlaşykly gatnaşyk saklamaga çalşyp gelýär. Şol ýörelge häzirki wagtda hem üstünlikli amal edilýär. Türkmenistanyň Milli tokaý maksatnamasyny üstünlikli durmuşa geçirmek maksady bilen indi her ýyl ýurdumyz boýunça millionlarça bag nahallary oturdylýar. Sanlyja ýyllaryň dowamynda ekilip, idedilip, boý alýan tokaý zolaklary bu gün oba şäherlerimiziň daş-töweregini, şäherara ýokary tizlikli ýollarymyzyň gyralaryny bezeýär. Bu bolsa bagtyýar durmuşymyzyň gadyr-gymmatyny atdyrýar. Ýaşyl öwsüp oturan baglary göreniňde gözleriň nurlanyp, kalbyňda beýik şahyrymyzyň “Kimde kim bir agaç ekse ýadygär, dünýä kitabynda onuň ady bar” diýen goşgy setirleri ýadyňa düşýär.
Türkmen halkynyň Milli Lideri Gahryman Arkadagymyz “Türkmen topragynyň gözelligini geljekki nesiller üçin aýap saklamak, Watanymyzyň gülläp ösmegini üpjün etmek her bir Türkmenistanlynyň borjudyr” diýen parasatly sözlerinden ugur alyp, türkmen topragynyň gözel tebigatyny geljekki nesiller üçin aýap saklamak, ýurdumyzy bagy-bossanlyga büremek, gülläp ösüşini üpjün etmek boýunça amala aşyrylýan beýik işlere öz goşandymyzy goşmak her birimiziň mukaddes borjumyzdyr!
Türkmenistanyň Agrar partiýasynyň Daşoguz şäher komitetiniň esasy hünärmeni Gurbangül Baýramkulyýewa