Türkmenistanyň Agrar partiýasy
Şu gün paýtagtymyzdaky Söwda-senagat edarasynda halkara ylmy-amaly maslahatyň we köpugurly serginiň açylyş dabarasy geçirildi. Ol “Arkadag Serdarly bagtyýar ýaşlar ýyly” şygary astynda tamamlanyp barýan ýylyň jemlerini jemleýän özboluşly çärä öwrüldi.
Forumyň açylyş dabarasyna Türkmenistanyň Mejlisiniň Başlygy, Halk Maslahatynyň Diwanynyň iş dolandyryjysy, Hökümet agzalary, ministrlikleriň, pudaklaýyn dolandyryş edaralarynyň, harby we hukuk goraýjy edaralaryň, jemgyýetçilik guramalarynyň, köpçülikleýin habar beriş serişdeleriniň ýolbaşçylarydyr wekilleri, Aşgabat we Arkadag şäherleriniň häkimleri, daşary döwletleriň, halkara guramalaryň ýurdumyzdaky diplomatik wekilhanalarynyň ýolbaşçylary, talyplar we beýlekiler gatnaşdylar. Bu möhüm çärä gatnaşmaga çagyrylan myhmanlaryň hatarynda goňşy we alysdaky birnäçe döwletleriň — Azerbaýjanyň, Italiýanyň, Gazagystanyň, Hytaýyň, Russiýanyň, Täjigistanyň, Türkiýäniň, Özbegistanyň, Fransiýanyň, halkara guramalaryň — Ýewropada Howpsuzlyk we Hyzmatdaşlyk Guramasynyň, Yslam Hyzmatdaşlyk Guramasynyň, Halkara kuraş assosiasiýasynyň, Halkara küşt federasiýasynyň wekilleri bar.
Ýygnananlar hormatly Prezidentimiz Serdar Berdimuhamedowyň foruma gatnaşyjylara iberen Gutlagyny uly ruhubelentlik bilen diňlediler. Onda gazanýan ähli üstünliklerimizde şöhratly geçmişimize, häzirki bagtyýar durmuşymyza we nurana geljegimize buýsanýan, eziz Watanymyzyň güýç-kuwwatyna öwrülen ýaşlarymyzyň goşandynyň örän uludygy nygtalýar. “Her bir güni uly üstünlikler, milli we halkara ähmiýetli wakalar bilen şöhratlandyrylan 2023-nji ýylda hem bagtyýar ýaşlarymyz ýurdumyzyň depginli ösüşine, öňe gitmegine gönükdirilen maksatlarymyzyň üstünlikli amala aşyrylmagyna mynasyp goşantlaryny goşdular” diýip, döwlet Baştutanymyz ýaş türkmenistanlylaryň geljekde-de döwletimiziň mundan beýläk-de gülläp ösmeginiň, halkara at-abraýynyň has-da belende galmagynyň bähbidine döredijilikli, ak ýürekden zähmet çekjekdiklerine berk ynam bildirdi.
Häzirki döwürde ýaş nesiller bilimlerini we zehinlerini dürli ders olimpiadalarynda, döredijilik bäsleşiklerinde, sungat festiwallarynda, sport ýaryşlarynda görkezýärler, döwlet hem-de hususy düzümlerde üstünlikli zähmet çekip, milli ykdysadyýetimiziň ähli pudaklarynyň okgunly ösdürilmegine işjeň gatnaşýarlar. Olaryň gazanan üstünlikleri şu gezekki köpugurly sergide giňden beýan edilýär.
Garaşsyzlyk ýyllarynda durmuşa geçirilen düýpli özgertmeler ýurdumyzyň keşbini tanalmaz derejede özgertdi. Gazanylan ägirt uly üstünlikler döwlet ösüş ugrunyň oýlanyşykly saýlanyp alnandygynyň görkezijisi bolmak bilen, bu ugry eziz Diýarymyzyň ykbaly we geljegi üçin jogapkärçilik çekýändiklerine düşünýän ähli türkmenistanlylaryň giňden goldaýandygynyň beýany boldy. Ýurdumyzy gülledip ösdürmegi we mähriban halkymyzyň ýaşaýyş-durmuş derejesini yzygiderli ýokarlandyrmagy baş maksat hökmünde kesgitlän hormatly Prezidentimiz Serdar Berdimuhamedow türkmen halkynyň Milli Lideri, Halk Maslahatynyň Başlygy Gahryman Arkadagymyzyň başyny başlan durmuş-ykdysady, demokratik özgertmeler syýasatyny üstünlikli durmuşa geçirýär.
Oýlanyşykly işlenip taýýarlanylan ykdysady strategiýa we halk hojalygynyň öňdebaryjy pudaklaryny hemmetaraplaýyn ösdürmek üçin amala aşyrylýan çäreler tutuş dünýä ykdysadyýeti üçin çylşyrymly bolan döwürde hem Türkmenistana jemi içerki önümiň ýokary ösüş depginini, senagat önümçiliginiň möçberiniň, daşary söwda dolanyşygynyň, harytlaryň hem-de hyzmatlaryň içerki bazarlardaky nyrhlarynyň durnuklylygyny üpjün etmäge mümkinçilik berdi. Jemgyýetçilik-syýasy, ykdysady, medeni, sport durmuşynda bolup geçýän möhüm wakalar tutuş dünýäde uly abraýa eýe bolan Garaşsyz, baky Bitarap Türkmenistanyň kuwwatyny gün-günden artdyrýar. Ýurdumyzyň ähli ugurlarda gazanan üstünlikleri şu giň gerimli sergide öz beýanyny tapdy.
Milli aýdym-sazlary ýerine ýetirýän döredijilik toparlarynyň çykyşlary sergiler merkezinde ýaýbaňlandyrylan baýramçylyk şowhunyna aýratyn öwüşgin çaýdy.
Sergi bilen tanyşlyk Türkmenistanyň Halk Maslahatynyň, Mejlisiniň, Daşary işler ministrliginiň diwarlyklaryndan başlanýar. Ministrlikleriň we pudaklaýyn dolandyryş edaralarynyň döwrebap mahabat enjamlary bilen enjamlaşdyrylan köp sanly ýöriteleşdirilen diwarlyklary pudaklaýyn üstünlikleri, kuwwatlyklary, hyzmatlar ulgamyndaky teklipleri tanyşdyrmak üçin netijeli meýdança boldy. Olarda maliýe-bank ulgamynyň, nebitgaz pudagynyň, oba hojalyk, gurluşyk-senagat, ulag-kommunikasiýalar toplumlarynyň, medeniýet, ylym, bilim, saglygy goraýyş ulgamlarynyň, jemgyýetçilik guramalarynyň üstünlikleri giňişleýin beýan edilýär.
Ýurdumyzyň welaýatlarynyň, Berkarar döwletiň täze eýýamynyň Galkynyşy döwrüniň nusgalyk nyşanlaryna öwrülen Aşgabat we Arkadag şäherleriniň häkimlikleriniň diwarlyklary sergä gelenlerde uly gyzyklanma döretdi. Gahryman Arkadagymyz tarapyndan başy başlanan ägirt uly şähergurluşyk taslamasynyň amala aşyrylmagy ýurdumyzda alnyp barylýan durmuş ugurly, Watanymyzyň hemmetaraplaýyn innowasion ösüşini, ykdysady kuwwatyny ýokarlandyrmagy hem-de ilatyň ýaşaýyş-durmuş derejesini mundan beýläk-de gowulandyrmagy maksat edinýän döwlet syýasatynyň üstünliklere beslenýändiginiň aýdyň güwäsidir.
Medeniýet ulgamynyň sergi bölümi foruma gatnaşyjylaryň we myhmanlaryň köp sanlysynyň ünsüni özüne çekýär. Bu bölümiň ýanynda halkymyzyň agzybirligini, jebisligini, Watanymyzyň Garaşsyzlygyny arzuw eden beýik türkmen şahyry Magtymguly Pyragynyň belent heýkeli ýerleşdirilipdir.
Serginiň merkezi böleginde ýaş hünärmenleriň taýýarlanylýan merkezleri bolan ýurdumyzyň ýokary okuw mekdepleriniň sergi bölümleri bar.
Mälim bolşy ýaly, belent ruhly, hemmetaraplaýyn bilimli, aň we beden taýdan kämil, watansöýüji ýaş nesli terbiýeläp ýetişdirmek Berkarar döwletiň täze eýýamynyň Galkynyşy döwründe döwlet syýasatynyň strategik wezipeleriniň biri hökmünde kesgitlenildi. 2022-nji ýylyň 19-njy martynda hormatly Prezidentimiz Serdar Berdimuhamedow iň ýokary döwlet wezipesine girişmek dabarasynda maksada okgunly, ýokary hünärli, taýýarlykly, giň gözýetimli, innowasion tehnologiýalary dolandyrmaga ukyply ýaşlary terbiýelemegi ilkinji nobatdaky wezipeleriň hatarynda belledi. Bu ugurda alnyp barylýan işleriň hukuk binýadyny pugtalandyrmak maksady bilen, binýatlaýyn resminama — «Ýaşlar barada döwlet syýasaty hakynda» Türkmenistanyň Kanunynyň rejelenen görnüşi işlenip taýýarlanyldy we kabul edildi. «Türkmenistanda ýaşlar baradaky döwlet syýasatynyň 2021 — 2025-nji ýyllar üçin Döwlet maksatnamasy» we ony durmuşa geçirmek boýunça çäreleriň meýilnamasy tassyklanyldy.
Täze ýylyň öňüsyrasynda döwlet Baştutanymyzyň türkmen ýaşlarynyň ýaşaýyş-durmuşyna, ähli ugurlarda gazanan üstünliklerine bagyşlap ýazan «Ýaşlar — Watanyň daýanjy» atly kitaby ähli türkmenistanlylar üçin ajaýyp sowgat boldy.
Yzygiderli ünsüň we goldawyň netijesinde, ýaş nesiller ýurdumyzyň döwlet hem-de jemgyýetçilik durmuşynda öňdebaryjy orunlara barha ynamly çykýarlar. Olaryň öňünde ähli gujur-gaýratyny, bilimlerini we başarnyklaryny ulanmak arkaly täze taryhy eýýamda başy başlanan ägirt uly özgertmeleri üstünlikli dowam etdirmek, öňde goýlan wezipeleri netijeli çözmek, Watanymyzyň mundan beýläk-de gülläp ösmegine gönükdirilen uzak möhletleýin maksatnamalary, geljegi uly taslamalary, meýilnamalary durmuşa geçirmek wezipeleri durýar. Ýurdumyzda ýaş türkmenistanlylaryň sagdyn ösmegi hem-de kämil şahsyýet hökmünde kemala gelmegi, aň-paýhas, döredijilik, ruhy mümkinçiliklerini doly derejede durmuşa geçirmekleri, ýurdumyzyň jemgyýetçilik-syýasy, durmuş-ykdysady, medeni durmuşyna işjeň gatnaşmaklary üçin ähli amatly şertler döredilýär. Tamamlanyp barýan 2023-nji ýylda ýaşlaryň başlangyçlaryny we üstünliklerini giňeltmek maksady bilen guralýan şu gezekki forum hem munuň nobatdaky güwäsidir.
Hormatly Prezidentimiz Serdar Berdimuhamedowyň baştutanlygynda üstünlikli durmuşa geçirilýän döwlet ýaşlar syýasaty halkara ylmy-amaly maslahatyň umumy mejlisindäki çykyşlaryň özenini düzdi. Forumyň işine sanly ulgam arkaly ýurdumyzyň ähli ýokary okuw mekdepleriniň professor-mugallymlar düzüminiň hem-de talyplarynyň gatnaşandygyny bellemek gerek. Nygtalyşy ýaly, ýurdumyzda ýaş nesliň terbiýesine aýratyn ähmiýet berilýär. Bu bolsa halkymyzyň asyrlaryň dowamynda kemala getiren ruhy-ahlak ýörelgeleriniň nusgalyk dowam etdirilýändiginiň ýene-de bir aýdyň mysalydyr. Hut ýaşuly nesliň akyl-paýhasyna we öwüt-ündewlerine eýerýän ýaşlar ýurdumyzyň durnukly ösüşi, beýik geljegi bilen bagly bolan her bir işe uly jogapkärçilik bilen çemeleşýärler.
«Döwlet adam üçindir!» diýen şygary baş ýörelge edinýän durmuş maksatly syýasatyň esasy ugurlarynyň biri ýaş raýatlaryň hukuk we durmuş taýdan goraglylygyny üpjün etmek bolup durýar. Munuň aýdyň beýany hökmünde türkmen halkynyň Milli Lideriniň başlangyjy bilen döredilen Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň alyp barýan işlerini görkezmek bolar. Gahryman Arkadagymyzyň, Arkadagly Gahryman Serdarymyzyň tagallalary hem-de goldawlary netijesinde, gaznanyň müdiriýeti köp sanly haýyr-sahawat çärelerini geçirdi. Ýurdumyzda gaznanyň serişdeleriniň hasabyna hassa çagalara 260 sany operasiýa geçirildi. Şeýle-de dürli keseller bilen kesellän howandarlyga mätäç çagalara zerur bolan bejeriş-anyklaýyş işleri ýerine ýetirildi. Ýurdumyzyň taryhynda ilkinji, häzirki döwrüň öňdebaryjy enjamlary bilen enjamlaşdyrylan Gurbanguly Berdimuhamedow adyndaky çagalar sagaldyş-dikeldiş merkeziniň Arkadag şäherinde gurlup ulanmaga berilmegi howandarlyga mätäç çagalara edilýän kömek-goldawlary has-da artdyrmaga şert döretdi.
Haýyr-sahawat gaznasynyň serişdeleriniň hasabyna welaýatlarymyzdaky hassahanalaryň çagalar bölümlerine «Tiz kömek» awtoulaglary gowşuryldy, mekdep-internatlar we çagalar öýleri bolsa saglygy goraýyş maksatly serişdeler bilen yzygiderli üpjün edilýär. Çylşyrymly durmuş ýagdaýyna düşen daşary ýurtly çagalar hem ünsden düşürilmeýär. Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň goldaw bermeginde Türkiýe Respublikasynyň, Owganystanyň, Russiýa Federasiýasynyň Primorskiý kraý sebitiniň, Ukrainanyň we Palestinanyň çagalaryna ynsanperwerlik kömekleri ugradyldy. Bu işler türkmen halkynyň asylly ynsanperwer ýörelgeleriniň üstünlikli dowam etdirilýändiginiň mysalydyr.
BMG-niň ýöriteleşdirilen düzümleri bilen ýakyn hyzmatdaşlyk hem gaznanyň işiniň möhüm ugurlarynyň biri bolup durýar. Ählumumy abadançylygyň bähbidine netijeli halkara dialogy ýola goýmakda türkmen tarapynyň möhüm başlangyçly orny eýeleýändigi üçin hoşallyk bildirip, BMG-niň Ösüş maksatnamasynyň Türkmenistandaky hemişelik wekili Narine Saakýan Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasyna BMG-niň Çagalar gaznasynyň ýurdumyzdaky wekilhanasynyň adyndan Hoşallyk hatyny gowşurdy.
Umumy mejlis tamamlanandan soňra, maslahatyň işi ýaşlar syýasatynyň dürli ugurlaryna bagyşlanan ýörite bölümçeleriň 10-synda dowam etdi. “Arkadag Serdarly bagtyýar ýaşlaryň Türkmenistanyň Halk Maslahatynda we Mejlisinde wekilçiligi — türkmeniň döwletlilik ýörelgesiniň dowamaty” atly bölümçe ýaşlaryň hukuklaryny we azatlyklaryny goramak ulgamynda kanun çykaryjylyk işini hem-de milli kanunçylygy döwrebaplaşdyrmak, döwrebap bilim-terbiýe almak üçin şertleri üpjün etmek, ýaşlaryň dünýägaraýşyny, ukyp-başarnyklaryny ösdürmek meselelerine bagyşlandy.
Bellenilişi ýaly, bu ugurdaky işler dünýäniň öňdebaryjy ýurtlarynyň toplan oňyn tejribelerine we halkara hukugyň umumy ykrar edilen kadalaryna laýyklykda alnyp barylýar. Garaşsyz Diýarymyzda ýaşlaryň hukuklary ygtybarly goralýar. Kabul edilen döwlet maksatnamalaryna laýyklykda, ýaş maşgalalar üçin döredilýän durmuş ýeňillikleriniň görnüşleri giňeldilýär. Olara goldaw bermek, häzirki zaman ýaşaýyş jaýy bilen üpjün etmek boýunça zerur çäreler amala aşyrylýar. Ýaşlara okajak mekdebini, okuwyň dilini, ugruny we görnüşini saýlap almaga doly hukuk berilýär. Olary iş bilen üpjün etmek, hünäri saýlap almak meselelerini çözmek boýunça zerur çäreler durmuşa geçirilýär. Şu ýyl ýurdumyzda geçirilen Mejlisiň deputatlarynyň saýlawlarynyň netijelerine görä, milli parlamentiň düzüminiň 37 göterimine golaýyny 35 ýaşa çenli ýaşlar düzýär. Munuň özi jemgyýetimizde ýaşlaryň eýeleýän ornunyň barha artýandygyna şaýatlyk edýär.
Şu ýylyň iýun aýynda kabul edilen «Türkmenistanyň ýaşlarynyň halkara hyzmatdaşlygynyň 2023 — 2030-njy ýyllar üçin Strategiýasyna» laýyklykda, döwlet dolandyryşynda ýaşlaryň eýeleýän ornuny ýokarlandyrmak, ýaşlaryň parlament gatnaşyklaryny ösdürmek we daşary döwletleriň ýaş parlamentarileri bilen hyzmatdaşlygy işjeňleşdirmek maksady bilen, Mejlisde ýaş parlamentarileriň topary döredildi.
Dünýä jemgyýetçiligi bilen özara gyzyklanma bildirilýän möhüm ugurlar, şeýle-de döwletimiz tarapyndan öňe sürülýän ählumumy abadançylyga ýardam bermäge gönükdirilen möhüm halkara başlangyçlary ilerletmek ugrunda çykyş edýän ýurdumyzyň daşary syýasatynyň üstünlikli durmuşa geçirilmeginde ýaşlaryň eýeleýän ornuna «Arkadag Serdarly bagtyýar ýaşlar Bitarap döwletiň daşary syýasatynda» atly bölümçede garaldy. Nygtalyşy ýaly, häzirki döwrüň wajyp meseleleri boýunça köptaraply halkara hyzmatdaşlygy ösdürmekde giň gözýetimli, başarnykly, täze dünýägaraýyşly ýaşlara uly orun degişlidir. Şeýle ýaşlar meseleleri çözmekde düýpgöter täzeçe, özara kabul ederlikli çemeleşmeleri teklip edip bilýärler.
Ýurdumyz öz üstüne alan halkara borçnamalaryna eýermegini dowam etdirmek bilen, ählumumy ösüşiň esasy ugurlary boýunça netijeli hyzmatdaşlygy çuňlaşdyrmagy maksat edinýär. Dünýäniň röwşen geljegini gurmak işine işjeň gatnaşýan ýaşlaryň halkara hyzmatdaşlygyny ösdürmek şolaryň esasylarynyň biridir. Giň mümkinçiliklere eýe bolmak bilen, ýaş nesiller ählumumy durnukly ösüşe ägirt uly goşant goşýarlar we umumy bähbidiň hatyrasyna hyzmatdaşlygyň täze görnüşlerini açýarlar.
«Arkadag Serdarly bagtyýar ýaşlar — kuwwatly ösüşiň berk binýady» atly bölümçe beden we ruhy taýdan sagdyn ýaş nesli kemala getirmegiň möhüm ugurlaryna bagyşlandy. Onda saglygy goraýyş, bilim, ylym ýaly möhüm ulgamlarda ýurdumyzyň gazanan üstünlikleri hem-de ýeten sepgitleri ara alnyp maslahatlaşyldy. Ýurdumyzda her ýyl orta we ýokary okuw mekdepleri, çagalar baglary, sport, sagaldyş merkezleri gurlup ulanmaga berilýär. Döwletimiz bütin dünýäde bilimiň ösdürilmegine we ýaşlar bilen baglanyşykly meseleleriň toplumlaýyn çözülmegine gönükdirilen BMG-niň Durnukly ösüş maksatlarynyň üstünlikli durmuşa geçirilmegine uly goşant goşýar.
Sanly bilim ulgamyny ösdürmegiň, daşary ýurt dillerini, tebigy we takyk ylmy ugurlara degişli dersleri okatmagy kämilleşdirmegiň degişli Konsepsiýalarynyň yzygiderli durmuşa geçirilmegi bilen, ýurdumyzda bilimiň hilini hem-de ylmy-barlag işleriniň netijeliligini ýokarlandyrmaga amatly şertler döredilýär.
Häzirki döwürde halkara guramalar, şol sanda BMG-niň ýöriteleşdirilen edaralary bilen bilelikdäki bilim taslamalary hem işjeň durmuşa geçirilýär. Magtymguly adyndaky Türkmen döwlet uniwersitetinde we Seýitnazar Seýdi adyndaky Türkmen döwlet mugallymçylyk institutynda ÝUNESKO kafedralary döredildi. Döwletmämmet Azady adyndaky Türkmen milli dünýä dilleri institutynda, Türkmenistanyň Daşary işler ministrliginiň Halkara gatnaşyklary institutynda, Türkmen oba hojalyk institutynda, Myrat Garryýew adyndaky Türkmenistanyň Döwlet lukmançylyk uniwersitetinde, Aba Annaýew adyndaky Halkara atçylyk akademiýasynda ÝUNESKO klublary döredildi. Ýurdumyzyň umumybilim berýän orta mekdepleriniň 6-sy bu guramanyň Assosirlenen mekdepleriniň toruna goşuldy.
Ýaş nesli terbiýelemekde jemgyýetçilik guramalaryna, şol sanda Türkmenistanyň Magtymguly adyndaky Ýaşlar guramasyna uly orun degişlidir. Bu gurama tejribe alyşmak, ýurdumyzyň ýaşlarynyň ukyp-başarnyklaryny ýüze çykarmak, olary durmuş taýdan goldamak, işewürlik we döredijilik işine ýardam bermek üçin dünýäniň köp sanly ýurtlary bilen işjeň hyzmatdaşlyk edýär. Türkmenistanyň Magtymguly adyndaky Ýaşlar guramasynyň BMG-niň Bilim, ylym we medeniýet meseleleri boýunça guramasynyň (ÝUNESKO) Bütindünýä ýaşlar jemgyýetiniň resmi agzalygyna kabul edilmeginiň ýurdumyzyň halkara ýaşlar dialogyny giňeltmek ugrunda alyp barýan işleriniň nobatdaky ykrarnamasy bolandygyny bellemek gerek.
Adam, onuň bagtyýarlygy we rowaçlygy baradaky alada ýurdumyzda alnyp barylýan durmuş ugurly döwlet syýasatynyň baş maksady bolup durýar. Milli saglygy goraýyş ulgamynyň yzygiderli kämilleşdirilmegi hem munuň aýdyň güwäsidir. Soňky ýyllarda onuň düzüminiň üsti dünýäniň meşhur önüm öndürijileriniň iň kämil enjamlary bilen enjamlaşdyrylan, Merkezi Aziýa sebitinde deňi-taýy bolmadyk häzirki zaman bejeriş-anyklaýyş, ylmy-kliniki merkezleri bilen ýetirilýär. “Saglyk” Döwlet maksatnamasynyň üstünlikli durmuşa geçirilmegi, türkmen halkynyň Milli Lideri, Halk Maslahatynyň Başlygy Gahryman Arkadagymyzyň başlangyçlarynyň hormatly Prezidentimiz tarapyndan mynasyp dowam etdirilmegi esasynda dürli keselleriň öňüni almak, anyklamak we bejermek işinde ýokary netijeler gazanyldy. Ýakynda ýurdumyza BMG-niň ýöriteleşdirilen düzümleri tarapyndan täze güwänamalaryň gowşurylmagy Türkmenistanyň saglygy goraýyş ulgamynda uly üstünlikleri gazanýandygyna aýdyň şaýatlyk edýär.
Şu gün dabaraly ýagdaýda Birleşen Milletler Guramasynyň Ösüş maksatnamasynyň Türkmenistandaky hemişelik wekili Narine Saakýan «Türkmenistanyň Hökümetiniň hemmeler üçin ýokary hilli dermanlara elýeterliligi, lukmançylyk hyzmatlarynyň yzygiderliligini we hilini üpjün etmek arkaly saglygy goraýşyň hyzmatlarynyň ählumumy gurşawynyň ýolunda ösüşi çaltlandyrmak boýunça möhüm tagallalary üçin» atly güwänamany; Germaniýa Federatiw Respublikasynyň Mýunhen şäherindäki Gauting Supramilli Referens barlaghanasy tarapyndan Ýokanç keselleri merkezleri müdiriýetiniň Merkezleşdirilen barlaghanasynyň molekulýar barlaglarynyň hiline daşarky baha beriş işleriniň üstünlikli geçirilendigini tassyklaýan üç sany güwänamany; Morfologiýa merkeziniň düzümindäki Merkezi kazyýet lukmançylyk edarasynyň kazyýet-himiýa barlaghanasyna Halkara akkreditasiýa şahadatnamasyny gowşurdy.
Soňra «UI GreenMetric World University Ranking» agentliginiň başlygy Riri Fitri Sari Türkmenistanyň ýokary okuw mekdepleriniň sekizisiniň «UI GreenMetric World University Ranking» atly halkara reýtinge goşulandygyny tassyklaýan şahadatnamany gowşurdy. Şolaryň hatarynda Ýagşygeldi Kakaýew adyndaky Halkara nebit we gaz uniwersiteti, Oguz han adyndaky Inžener-tehnologiýalar uniwersiteti, S.A.Nyýazow adyndaky Türkmen oba hojalyk uniwersiteti, Türkmen döwlet maliýe instituty, Türkmenistanyň Telekommunikasiýalar we informatika instituty, Türkmenistanyň Inžener-tehniki we ulag kommunikasiýalary instituty, Türkmenistanyň Döwlet energetika instituty, Türkmen oba hojalyk instituty bar.
Halkara küşt federasiýasynyň meýilleşdirmek we ösüş maksatnamalary komissiýasynyň maslahatçysy Bakyt Omurzakow halkara grossmeýsteriň adyna ýetmekde möhüm ösüşleri gazanandygy baradaky şahadatnamany Saparmyrat Atabaýewe gowşurdy.
Halkymyzyň baý taryhy-medeni mirasyny we köpasyrlyk ruhy-ahlak däplerini öwrenmek, aýawly saklamak, wagyz etmek meseleleri «Arkadag Serdarly ylhamly ýaşlar» atly bölümçäniň esasy mazmunyny düzdi.
Döwlet syýasatynyň ileri tutulýan ugurlaryna laýyklykda, häzirki wagtda ýurdumyzda Berkarar döwletiň täze eýýamynyň Galkynyşy döwründe durmuşa geçirilýän beýik özgertmeleri ýaşlara düşündirmekden başga-da, olara watançylyk terbiýesini bermäge, eziz Watanymyzyň şöhratly geçmişine, bagtyýar şu gününe we beýik geljegine bolan buýsanjy artdyrmaga hem uly üns berilýär.
Birleşen Milletler Guramasynyň Ösüş maksatnamasynyň Türkmenistandaky hemişelik wekili Narine Saakýanyň «Beýik Ýüpek ýoly: Zarawşan — Garagum geçelgesi» atly köptaraplaýyn hödürnamanyň ÝUNESKO-nyň Bütindünýä mirasynyň sanawyna girizilendigini tassyklaýan şahadatnamany gowşurmagy bu ugurda alnyp barylýan yzygiderli, giň gerimli işleriň üstünliklere beslenýändiginiň aýdyň görkezijisi boldy. Täjigistanda, Türkmenistanda we Özbegistanda ýerleşýän 31 sany ýadygärligi özünde jemleýän transmilli tapgyrlaýyn hödürnama ady rowaýata öwrülen Beýik Ýüpek ýolunyň bu böleginde öz döwründe binagärlik, tehnologik, monumental sungat we şähergurluşyk işinde belent sepgitleriň gazanylandygyny äşgär edýär. Bu ýadygärlikleri ÝUNESKO-nyň Bütindünýä mirasynyň sanawyna girizmek baradaky çözgüt şu ýylyň 17-nji sentýabrynda Saud Arabystany Patyşalygynyň paýtagty Er-Riýad şäherinde geçirilen ÝUNESKO-nyň Bütindünýä mirasy komitetiniň 45-nji giňişleýin mejlisinde kabul edildi.
Mälim bolşy ýaly, bu mejlisde «Aram guşaklykdaky Turan çölleri» atly köptaraplaýyn hödürnama bilen bir wagtda ýurdumyzyň «Bereketli Garagum», «Gaplaňgyr» döwlet tebigy goraghanalarynyň, «Repetek» döwlet biosfera goraghanasynyň we onuň «Ýerajy» çäkli goraghanasynyň çöl ekoulgamlaryny ÝUNESKO-nyň Bütindünýä mirasynyň sanawyna girizmek baradaky çözgütler hem biragyzdan kabul edildi. Munuň özi tebigy baýlyklary we gaýtalanmajak ekoulgamlary gorap saklamak ulgamynda ýurdumyzyň durmuşa geçirýän işleriniň halkara jemgyýetçilik tarapyndan ykrar edilýändiginiň nobatdaky aýdyň güwäsi boldy.
«Aram guşaklykdaky Turan çölleri» atly köptaraplaýyn hödürnamanyň ÝUNESKO-nyň Bütindünýä mirasynyň sanawyna girizilendigini tassyklaýan şahadatnama “Arkadag Serdarly bagtyýar ýaşlar ýylynda oba hojalyk ulgamynyň innowasion ösüşiniň daýanjy ýaşlar» atly bölümçede BMG-niň Ösüş maksatnamasynyň Türkmenistandaky hemişelik wekili Narine Saakýan tarapyndan gowşuryldy. Bellenilişi ýaly, şöhratly pederlerimiziň esaslandyran tebigata aýawly çemeleşmek däplerine laýyklykda, ýurdumyzda daşky gurşawy goramak, tebigy serişdeleri rejeli peýdalanmak, “ýaşyl” ykdysadyýeti ösdürmek maksatlaryna gönükdirilen çäreler durmuşa geçirilýär.
Berkarar döwletiň täze eýýamynyň Galkynyşy döwründe söwda ulgamyny kämilleşdirmek, daşary söwdanyň möçberini artdyrmak we giňeltmek boýunça maksatnamalaýyn çäreler, bu işe ýaşlary işjeň çekmek wezipeleri «Arkadag Serdarly bagtyýar ýaşlar ýylynda Türkmenistanyň söwda toplumynda gazanylan üstünlikler» atly bölümçede ara alnyp maslahatlaşylan esasy mesele boldy. Söwda we hyzmatlar ulgamynyň dowamly ösüşini üpjün etmek bäsdeşlige ukyply milli ykdysadyýeti kemala getirmegiň möhüm şertidir. Türkmenistan bazar gatnaşyklaryny çuňlaşdyrmak maksadyndan ugur alyp, telekeçilik işini hemmetaraplaýyn höweslendirýär, şol sanda ýaşlaryň telekeçilik başlangyçlaryna ähli babatda goldaw berýär. Häzirki wagtda ýaşlar ýokary hilli, bäsdeşlige ukyply önümleri öndürmek, azyk bolçulygyny üpjün etmek, senagat kärhanalaryny, döwrebap söwda merkezlerini gurmak meselelerini we obalary gurmak boýunça öňde goýlan wezipeleri ýerine ýetirmekde möhüm ähmiýete eýe bolan Türkmenistanyň Senagatçylar we telekeçiler birleşmesiniň agzalarynyň aglaba bölegini emele getirýärler.
«Ýaşlar — durnukly ösüş syýasatynyň hereketlendirijileri» atly bölümçäniň işinde maliýe-ykdysady ulgamy kämilleşdirmek babatda gazanylan üstünlikler we bu ugurda geljegi uly ýaş hünärmenleriň wezipeleri barada pikir alşyldy. Bellenilişi ýaly, ykdysadyýeti sanlylaşdyrmagyň çäklerinde bank hyzmatlarynyň gerimi okgunly ösýär, elektron tölegleriň sanawy yzygiderli artýar, nagt däl tölegleriň möçberi ýokarlanýar. Bank ulgamyny ösdürmek milli ykdysady strategiýanyň esasy ugurlarynyň biridir, bu ulgamyň edaralary halk hojalygy toplumynyň dürli pudaklarynyň arasynda maliýe serişdeleriniň netijeli paýlanmagyny üpjün etmek, milli ykdysadyýetiň bäsdeşlige ukyplylygyny artdyrmaga we innowasion ösüşine ýardam bermek ýaly möhüm wezipeleri ýerine ýetirýär.
«Arkadag Serdarly bagtyýar ýaşlar ýylynda nebitgaz pudagynda ýaşlaryň orny» atly bölümçe milli ykdysadyýetiň binýatlyk pudagynyň — nebitgaz toplumynyň gazananlaryna bagyşlandy. Türkmenistan energiýa serişdeleriniň baý ätiýaçlyk gorlaryna eýe bolmak bilen, milli ýangyç-energetika toplumynyň mümkinçiliklerini barha ösdürýär, nebit we gaz ýataklaryny senagat taýdan özleşdirmek, halkara standartlara laýyk gelýän ýokary hilli önümleri öndürmek üçin nebit we gaz serişdelerini gaýtadan işlemek, tebigy gazyň dünýä bazarlaryna iberilmegini diwersifikasiýalaşdyrmak boýunça giň gerimli işleri amala aşyrýar. Häzirki wagtda bu işe ezber halypalarynyň tejribesini we başarnyklaryny üstünlikli özleşdiren ýaş hünärmenler işjeň çekilýär. Ýewropanyň Hil barlaglary boýunça jemgyýetiniň baş dolandyryjysy Maýkl Harris tarapyndan «Türkmengaz» döwlet konsernine sanly ulgam arkaly «Quality Achievements Awards 2023» atly halkara hil baýragynyň gowşurylmagy ulgamyň gazanan üstünlikleriniň ykrarnamasy boldy.
«Arkadagly Gahryman Serdarymyzyň we Gahryman Arkadagymyzyň hemmetaraplaýyn goldawlaryndan ylham alýan ýaşlar eziz Watanymyzyň abraý-mertebesini belende göterýärler» atly bölümçede gurluşyk-senagat toplumyny we himiýa senagatyny ösdürmegiň mümkinçilikleri ara alnyp maslahatlaşyldy. Gurmak we döretmek Berkarar döwletiň täze eýýamynyň Galkynyşy döwrüniň şygarydyr. Muňa türkmen halkynyň Milli Lideri Gurbanguly Berdimuhamedow tarapyndan başy başlanan we Arkadagly Gahryman Serdarymyz tarapyndan üstünlikli dowam etdirilýän giň gerimli şähergurluşyk syýasaty aýdyň şaýatlyk edýär. Bu syýasatyň üstünlikli durmuşa geçirilmegi netijesinde şäherlerimiziň we obalarymyzyň keşbi tanalmaz derejede özgerdi. Iň täze sanly tehnologiýalary özünde jemleýän döwrebap Arkadag şäheriniň gurulmagy munuň aýdyň güwäsidir.
Sebitde deňi-taýy bolmadyk «akylly» şäheriň gurulmagy häzirki döwürde ýurdumyzyň ykdysady mümkinçilikleriniň, onuň ylmy-tehniki ösüşiň belentliklerine çykýandygynyň görkezijisine öwrüldi. Durmuşa geçirilýän taslamalar, döwlet tarapyndan berilýän uly goldawlar gurluşyk pudagynyň hemmetaraplaýyn ösmegine itergi berdi. Ýurdumyzda iň täze enjamlar we öňdebaryjy tehnologiýalar bilen enjamlaşdyrylan häzirki zaman kärhanalary gurulýar, bar bolan önümçilik desgalarynyň kuwwatlyklary artdyrylýar.
Iň täze tehnologiýalar, öňdebaryjy ylmy-tehniki taslamalar ulag-aragatnaşyk ulgamyna hem işjeň ornaşdyrylýar. Bu hakykat «Arkadag Serdarly bagtyýar ýaşlar innowasion ösüşlere tarap» atly bölümçede edilen çykyşlarda öz beýanyny tapdy. Bellenilişi ýaly, bu pudakda zähmet çekýän işgärleriň ýarysy diýen ýaly gujurly, maksada okgunly, giň dünýägaraýyşly ýaşlardyr. Olaryň käbiri eýýäm agentliklerde dürli ýolbaşçy wezipeleri eýeläp, möhüm, jogapkärli çözgütleri kabul edýärler.
Ýaşlar esasy işlerinden başga-da döwlet derejesindäki we halkara forumlara, maslahatlara, sergilere, sport, medeni-köpçülikleýin çärelere işjeň gatnaşýarlar. Her ýylda «Sanly çözgüt» atly innowasion taslamalar bäsleşiginiň geçirilmegi asylly däbe öwrüldi. Bu bäsleşik ýurdumyzda sanly ulgamyň ösüşine goşant goşýan programma üpjünçiligini işläp düzmek we oýlap tapyşlar bilen meşgullanýan ýaşlary ýüze çykarmak, höweslendirmek, täze başlangyçlary ýola goýmak maksady bilen geçirilýär.
Şu gün ulag-kommunikasiýalar toplumynyň edaralary halkara güwänamalaryň birbada birnäçesine mynasyp boldy. Birleşen Milletler Guramasynyň Ösüş maksatnamasynyň Türkmenistandaky hemişelik wekili Narine Saakýan Türkmenistanda hususy pudagyň arasynda sanly özgerişlikleri üstünlikli öňe sürmekde, sanly ykdysadyýeti ösdürmekde we ýurduň sowatly ýaşlaryny goldamakda Türkmenistanyň Ministrler Kabinetiniň ýanyndaky Ulag we kommunikasiýalar agentliginiň «Türkmenaragatnaşyk» agentliginiň tagallalaryny ykrar etmek hakynda şahadatnamany we diplomy gowşurdy.
Fransiýa Respublikasynyň «Bureau Veritas» klassifikasion jemgyýetiniň Türkmenistandaky şahamçasynyň wekili Ýazmyrat Malakow «Balkan» gämi gurluşyk we abatlaýyş zawody» açyk görnüşli paýdarlar jemgyýetine «Bureau Veritas Marine Kazakhstan» jogapkärçiligi çäklendirilen guramasynyň «Gämi gurluşygy we abatlamak babatda önjeýli hyzmatdaşlyk we ýakyndan ýardam üçin» şahadatnamasyny gowşurdy. Beýik Britaniýanyň Sertifikatlaşdyrylan logistika we ulag institutynyň Merkezi Aziýadaky wekilhanasynyň Baş sekretary Erbol Muhaýew sanly ulgam arkaly Türkmenistanyň Ministrler Kabinetiniň ýanyndaky Ulag we kommunikasiýalar agentliginiň «Türkmenawtoulaglary» agentligine Beýik Britaniýanyň Sertifikatlaşdyrylan logistika we ulag institutynyň Merkezi Aziýadaky wekilhanasynyň adyndan «Türkmenistanyň logistika we awtomobil ulaglary pudagynda ýaşlaryň ösüşine üstünlikli goşant goşandygy üçin» şahadatnamasyny gowşurdy. Demir ýollaryň hyzmatdaşlyk guramasynyň komitetiniň başlygy Miroslaw Antonowiç sanly ulgam arkaly Türkmenistanyň Ministrler Kabinetiniň ýanyndaky Ulag we kommunikasiýalar agentliginiň «Türkmendemirýollary» agentligine Demir ýollaryň hyzmatdaşlyk guramasynyň işine goşandy üçin Hormat diplomyny gowşurdy.
Maslahata gatnaşyjylar Watanymyzyň gazanýan ägirt uly üstünliklerine we ýeten sepgitlerine çäksiz buýsanýan ýaşlaryň jemgyýetçilik işjeňliginiň mundan beýläk-de ýokarlandyrylmagyna gönüden-göni goşant goşýan şeýle çäreleriň möhüm ähmiýetine ünsi çekip, dünýäde parahatçylygy, durnukly ösüşi üpjün etmäge, halkara hyzmatdaşlygyň, şol sanda ýaşlaryň arasyndaky gatnaşyklaryň giňeldilmegine gönükdirilen köpugurly işleri üçin hormatly Prezidentimiz Serdar Berdimuhamedowa hem-de türkmen halkynyň Milli Lideri, Halk Maslahatynyň Başlygy Gahryman Arkadagymyza tüýs ýürekden hoşallyk bildirdiler.
Halkara ylmy-amaly maslahatyň ahyrynda Arkadag Serdarly bagtyýar ýaşlar ýylynda aýratyn tapawutlanan ýaşlary döwlet sylaglary bilen sylaglamak dabarasy boldy. Türkmenistanyň Prezidentiniň Permanyna laýyklykda, ýurdumyzyň halk hojalygy toplumynyň ähli pudaklarynda üstünlikli zähmet çekýän ýaşlar sylaglanyldy.
Şu ýylda ýaş nesliň wekilleri bilimde, ylymda, sportda, medeniýetde, senagatda, oba hojalygynda we ykdysadyýetiň beýleki pudaklarynda uly üstünlikleri gazandylar, diňe bir ýurdumyzda däl, eýsem, halkara derejeli ýaryşlarda, olimpiadalarda-da ýeňiş gazanyp, Watanymyzyň Döwlet baýdagyny belentde parlatdylar.
Soňra şu ýylyň sentýabr aýynda Türkmenistanyň Prezidentiniň «Türkmeniň Altyn asyry» baýragyny almak ugrundaky bäsleşigiň çäklerinde döredijilik bilen meşgullanýan 35 ýaşa çenli ýaşlaryň arasynda yglan edilen «Pähim-paýhas ummany Magtymguly Pyragy» bäsleşiginiň ýeňijilerini sylaglamak dabarasy geçirildi. Bu bäsleşigiň geçirilmeginiň esasy maksady Gündogaryň beýik akyldary we nusgawy şahyry Magtymguly Pyragynyň doglan gününiň 300 ýyllyk baýramyny dabaraly ýagdaýda bellemekden, türkmen halkynyň meşhur oglunyň baý edebi mirasyny wagyz etmekden we öwrenmekden, ýaşlary döredijilik bilen meşgullanmaga höweslendirmekden, olarda şahyryň eserlerinde beýan edilýän watansöýüjilik, asyllylyk, ynsanperwerlik ýaly häsiýetleri terbiýelemekden ybaratdyr.
Döwlet Baştutanymyzyň Kararyna laýyklykda, bäsleşigiň ýeňijilerine Türkmenistanyň Prezidentiniň altyn zynjyry we pul baýragy gowşuryldy.
Şeýle hem bu ýerde türgenleri, hususan-da, şu ýylyň noýabr aýynda Aşgabatda geçirilen Kuraş boýunça 14-nji dünýä çempionatynda ýokary netijeleri gazanan türgenleri, olary bu iri halkara ýaryşa taýýarlamaga şahsy goşant goşan tälimçileri sylaglamak dabarasy boldy.
Sagdyn durmuş ýörelgesiniň, bedenterbiýäniň we sportuň wagyz edilmegi jemgyýetiň hem-de döwletiň bähbidine ýaşlaryň mümkinçiliklerini iň ýokary derejede peýdalanmaga gönükdirilen ýaşlar syýasatynyň möhüm ugurlarynyň biridir. Hormatly Prezidentimiz Serdar Berdimuhamedow köpçülikleýin bedenterbiýe-sagaldyş hereketini we ýokary netijeli sporty höweslendirmek, wagyz etmek, ýokary derejede ösdürmek meselelerini hemişe üns merkezinde saklap, bu meselelere döwlet derejesinde jogapkärli çemeleşýär.
Ýurdumyzda sportuň dürli görnüşleri bilen meşgullanmak üçin ähli şertleri döretmek ugrunda yzygiderli işler alnyp barylýar. Ýaş türkmenistanlylar üçin ajaýyp sport toplumlary we köpugurly stadionlar, köp sanly sport mekdepleri ulanmaga berilýär, olarda tälim alýan ýaşlaryň sany ýyl-ýyldan artýar. Türkmen türgenleri döwlet tarapyndan edilýän aladalara we berilýän goldawlara jogap edip, iri ýaryşlarda ýeňiş gazanýarlar.
Hormatly Prezidentimiz Serdar Berdimuhamedowyň Buýrugyna laýyklykda, şu gün futbol boýunça Türkmenistanyň çempiony we ýurduň Kubogynyň eýesi bolan «Arkadag» futbol toparyna «MAN RR3 19.440 EEV» kysymly awtobusyň açary gowşuryldy. Bu futbol toparynyň şu ýyl türkmen halkynyň Milli Lideri Gurbanguly Berdimuhamedowyň başlangyçlary netijesinde bedenterbiýe we sport bilen meşgullanmak üçin ösen infrastruktura döredilen täze Arkadag şäherinde esaslandyrylmagy ýurdumyzyň sport durmuşynda möhüm waka bolup, sportuň bu meşhur görnüşiniň mundan beýläk-de ösmegine kuwwatly itergi berdi.
Dünýäniň dört yklymynyň — Aziýanyň, Afrikanyň, Ýewropanyň, Günorta we Demirgazyk Amerikanyň wekillerini paýtagtymyzda jemlän Kuraş boýunça dünýä çempionatynyň netijelerine görä, türkmen kuraşçylary erkekleriň arasynda ýedi, zenanlaryň arasynda sekiz, jemi 15 agram derejesinde 15 medal gazandylar. Munuň özi ýurdumyzyň sport ulgamynda gazanylan nobatdaky üstünlikdir.
Türgenlere hem-de ýurdumyzyň tälimçi-mugallymlaryna sowgat hökmünde 2 sany «Toyota Camry V6» we 5 sany «Toyota Fortuner SR5» kysymly 2023-nji ýylda öndürilen awtoulagyň açarlary dabaraly ýagdaýda gowşuryldy.
Ýaşlar hormatly Prezidentimiz Serdar Berdimuhamedowa we Türkmenistanyň Halk Maslahatynyň Başlygy Gahryman Arkadagymyza tüýs ýürekden hoşallyk bildirip, mähriban Watanymyzyň hemmetaraplaýyn gülläp ösmegi ugrunda ähli tagallalary etjekdiklerine ynandyrdylar.
Agşam Türkmenistanyň hem-de daşary ýurtlaryň medeniýet we sungat ussatlarynyň bilelikdäki baýramçylyk konserti geçirildi.
Ertir bolsa şu ýylda aýratyn tapawutlanan ýaşlara hormatly Prezidentimiz Serdar Berdimuhamedowyň adyndan gymmat bahaly sowgatlary, ministrlikleriň we pudaklaýyn dolandyryş edaralarynyň sowgatlaryny, şahadatnamalaryny hem-de diplomlaryny gowşurmak dabarasy geçiriler.
Sergi öz işini 30-njy dekabrda tamamlar.